خەیاڵ و داهێنانەکانی منداڵ لە قۆناغی باخچەدا
باخچەی منداڵان یەکەمین ناوەندی پەروەردەییە، کە منداڵ کارامەیی و کۆمەڵایەتیبوونی خۆی تێدا بەدەست دەهێنێت، خەیاڵ و داهێنانەکانیش لە توانا سەرەتاییەکانی منداڵان دادەنرێن لەو قۆناغەدا، داهێنان توانای بیرکردنەوەی منداڵە بە شێوازێکی نوێ بۆ چارەسەرکردنی کێشەکان یاخود دەربڕینی بیرۆکەکان، بیرکردنەوەی سەربەخۆ و ڕەخنەیی لەخۆ دەگرێت، خەیاڵیش توانای منداڵە بۆ دروستکردنی وێنە و سیناریۆی دەروونی، کە لە سروشتدا بوونیان نییە. یارییە خەیاڵییەکان و چیرۆک وێناکردنی شتەکان بە شێوەیەکی جیاواز لەخۆ دەگرێت.
خەیاڵ و داهێنان ڕۆڵێکی گرنگ دەگێڕن لە گەشەکردنی توانای هزری و کۆمەڵایەتی و گەڕان بەدوای جیهانی دەوروبەردا، لەو قۆناغە گرنگەی تەمەنی منداڵان گەشەکردنی ئەو توانایانە لە ڕێگەی پەروەردەی ڕاستەوخۆوە بەدەست ناهێندرێت، بەڵکوو لە ڕێگەی ژینگەیەکی دەوڵەمەند بەدەست دەهێندرێت، کە پڕە لە ئەزموون و منداڵ هان دەدات بۆ گەڕان و داهێنان، بە نموونە یارییە خەیاڵییەکان دەرگا بەڕووی منداڵاندا واڵا دەکەن بۆ جیهانێکی نوێ و تێیدا ئەزموونی کاراکتەری نوێ و بارودۆخی جیاواز دەکات، پەرە بە توانای پەیوەندیکردن و کۆمەڵایەتیبوونی دەدات، چالاکییە هونەرییەکان و وێنەکێشان یارمەتییان دەدات هەست و بیرکردنەوەی ناوەکییان بە شێوازێکی داهێنەرانە دەرببڕن. بێگومان چیرۆکیش یارمەتی منداڵان دەدات کە چۆن سەرەتا و کۆتایی دروست بکات و گەشە بە توانای قسەکردن و گفتوگۆکردنی بدات، کاتێک منداڵ هان دەدرێت چیرۆکی خۆی دابڕێژێت، نەک هەر پەرە بە توانای قسەکردنی دەدات، بەڵکوو خەیاڵی خۆی ئازاد دەکات بۆ بەستنەوەی ڕووداوەکان لەگەڵ ئەوەی منداڵان لە ڕێگەی میوزیک و جوڵە و دەربڕینەوە دەرفەتیان دەبێت بۆ داهێنان، بیرکردنەوەی هەموو منداڵێک هەرچەندە سادە و نامۆ بێت، پێویسته بەهەند وەربگیرێت و ڕێزی لێ بگیرێت، چونکە ڕەنگدانەوەی شێوازی بیرکردنەوە و تێڕوانینی خۆیەتی، باشتر وایە پەروەردەکان و خێزانەکان لەو قۆناغەدا، پشتیوانی منداڵان بن، کەرەستە و بیرۆکەیان بۆ دابین بکەن، بۆشاییان بۆ جێبهێڵن، تا منداڵان لەسەرخۆ داهێنان و دۆزینەوە بکەن، چاندنی تۆوی داهێنان لە سەرەتاکانی تەمەنی منداڵدا وەبەرهێنانێکی درێژخایەنە، بەردی بناغەی گەشەکردنی کەسایەتیی منداڵ و توانا فرەییەکانییەتی، بە دابینکردنی ژینگەیەکی پاڵپشت و هاندەر دەتوانین یارمەتیی منداڵان بدەین، بۆ گەڕان بەدوای تواناکانیان و فراوانکردنی ئاسۆی بیرکردنەوەیان، پەرەپێدانی ئەو کارامەییانە لە قۆناغی باخچەی منداڵان، نەک هەر دەبێتە هۆی گەشەکردنی سۆزداری و دەروونییان، بەڵکوو بناغەیەکی تۆکمە بۆ داهاتوویەکی پڕ لە داهێنان و سەرکەوتن و بەرەوپێشچوون دادەنێت، چونکە ئاشکرایە بیرکردنەوە و کارکردن هەرچەند سادە و ساکاریش بن، بۆ ئەو قۆناغەی تەمەنی منداڵ گرنگ و بنیاتنەرن و کاریگەریی تەواوی لەسەر ژیان و داهاتووی منداڵ دەبێت.
